Serikali yapata pigo la pili kodi ya simu

NA HELLEN MWANGO

14th October 2013

B-pepe

Chapa

Kadi za Simu

Wakati Mahakama Kuu Tanzania  ikitarajia kusikiliza maombi ya Chama cha Kutetea Walaji wa Huduma za Simu (TCAS), ya kusimamisha utekelezaji wa Sheria ya Kodi  za simu kwa muda, mwezi huu, Bodi ya Rufaa za Kodi (TRAB) imesimamisha utekelezaji  wa sheria hiyo. Bodi hiyo katika uamuzi wake imesema utekelezaji wa sheria hiyo umesimamishwa hadi hapo itakapomalizika kesi iliyoko mahakamani.

Hatua hiyo ilifikiwa na TRAB baada ya Mamlaka ya Mapato nchini (TRA) kukubaliana na  kampuni za huduma za simu za mkononi  kwa kufikia uamuzi wa pamoja kusimamisha utekelezaji wa taarifa yake kuzitaka kampuni hizo kuwasilisha makusanyo ya kodi hiyo. Oktoba Mosi, mwaka huu TRAB ilisimamisha utekelezaji wa sheria hiyo baada ya makubaliano kati yake na kampuni za simu nchini.

Septemba 25, mwaka huu, TRA iliziandikia barua kampuni hizo ikizitaka ziwasilishe  makusanyo ya kodi ya simu kutoka kwa wateja wake ya mwezi Julai pamoja na riba kwa kuchelewa kuwasilisha kodi hiyo.

Aidha, taarifa hiyo ya TRA dhidi ya kampuni  hizo ilikuwa ni utekelezaji wa Marekebisho ya mwaka 2013 ya Sheria namba 4 ya Fedha, yaliyoelekeza kila kadi ya simu kutozwa kodi ya Sh. 1,000 kwa mwezi.

Hata hivyo, kampuni hizo zilikata rufaa katika TRAB zikipinga utekelezaji wa sheria hiyo, pamoja na mambo mengine zikipinga kutupiwa jukumu la kukusanya kodi hiyo kutoka kwa wateja wake. Mbali na rufaa hiyo, pia kampuni za simu ziliwasilisha maombi ya zuio la muda la utekelezaji wa sheria hiyo, kama  barua ya TRA ilivyozitaka, ili kusubiri usikilizwaji na uamuzi wa rufaa zake, katika bodi hiyo. Kutokana na rufaa na maombi hayo ya kampuni za simu, TRA kupitia kwa mwanasheria wake, Juma Beleko, na wakili wa kampuni hizo, Rosan Mwambo, walikubaliana  TRA kusitisha utekelezaji wa madai yake hayo.

Makubaliano mengine yaliyofikiwa na pande zote ni warufani kuondoa maombi yao ya zuio la muda la utekelezaji wa sheria hiyo, rufaa za kampuni zote kuunganishwa na kuwa moja, na kutokuwa na amri ya gharama za maombi hayo

Hata hivyo, TRAB iliridhia makubaliano hayo na kuwa amri yake halali, huku ikiagiza usikilizwaji wa rufaa hizo ufanyike kwa njia ya maandishi ambapo pande zote zimeamriwa kuwasilisha hoja zake za maandishi, na kisha kusubiri hukumu.

Pamoja na TRA na kampuni hizo kufikia uamuzi huo huko TRAB, Mahakama Kuu Tanzania, Kanda ya Dar es Salaam imepanga kusikiliza maombi ya TCAS ya zuio la muda la utekelezaji wa sheria hiyo kodi za simu, Oktoba 21, mwaka huu.

TCAS ilifungua maombi hayo ya  zuio la muda la utekelezaji wa sheria hiyo, kusubiri hukumu ya kesi yao ya Kikatiba waliyoifungua mahakamani hapo dhidi ya Waziri wa Fedha na Mwanasheria Mkuu wa Serikali (AG),

Katika kesi hiyo TCAS kinapinga Sheria hiyo ya kutoza kodi ya Sh 1,000 kwa kila mwenye kadi ya simu inayotumika, kila mwezi, wakidai kuwa sheria hiyo ni kandamizi na kinyume cha Katiba kwa kuwa itawanyima wengi haki ya mawasiliano.

Mahakama hiyo tayari imesharuhusu makampuni matano ya huduma za simu za mkononi, ya Tigo, Aitel, Vodacom, TTLC na Zantel, kuunganishwa katika kesi hiyo, upande wa walalamikaji.

Kesi hiyo inasikilizwa na Jopo la majaji watatu, linaloongozwa na Mwenyekiti Jaji Aloyisius Mujuluzi, akisaidiana na Lawrence Kaduri na Salvatory Bongole.

CHANZO: NIPASHE