WATOTO WA MADRASA CHAKE NA MKOANI WAFANYIWA UCHUNGUZI WA MARADHI.

 Daktari wa koo,pua na masikio akimwangalia mmoja ya watoto wa madrasa aliyefika katika siku ya mtoto wa madrasa-Mtambile.

Daktari wa meno akimuangalia mtoto wa madrasa matatizo ya meno huko Ziwani Pemba.

Pemba.                                                                                                                    Jamii imehimizwa kuwapeleka watoto wao katika madrasa kwa wakati unaofaa badala ya kuwaachia wakizurura ovyo mitaani bila ya kuwa na chakufanya.

Wito huo umetolewa na Mjumbe wa kamati ya Madrasat Islamiya ya Ziwani Bw. Hamim Khamis Kazuba alipokuwa akitoa neno kwenye shughuli maalum ya siku ya afya ya Madrasa huko Ziwani Chake Chake.

Amesema wapo baadhi ya watu wanaowachia watoto wao majumbani kwa kipindi kirefu bila ya kuwapeleka madrasa bila ya kuwa na sababu huku watoto hao wakikosa fursa adhimu ya kujifunza pamoja na watoto wenzao waliopelekwa katika madrasa.

Mjumbe huyo amesema kuwa endapo jamii itawajenga watoto wao kwa mafunzo ya elimu mapema watawajengea msingi bora wa elimu na malezi bora,na kuwahimiza wazee walio na  watoto wenye ulemavu kuwapeleka madrasa watoto hao  kwa vile na wao wanayo haki ya kupata elimu.

Hata hivyo Mratibu wa Zanzibar Madrasa Resouce Centre Pemba Mwalim Hassan Abdi Bakar amesema Jumuiya imeendaa siku hiyo maalum kwa ajili ya kuangalia afya za watoto wa madrasa na watoto wengine ili kujenga afya bora za watoto.

Amesema kupitia siku hiyo ya afya ya madrasa pia wazazi hupata kuona maonyesho mbali mbali yanayotokana na mafunzo wanayoyapata katika madrasa hizo.

Mradi huo wa kutoa huduma za uchunguzi wa afya na lishe kwa watoto wa madraasa hufanywa mara nne kwa mwaka na jumuiya hiyo katika Wilaya zote nne za  kisiwani Pemba.