MAGUNIA 20 YA KARAFUU KAVU YAOKOLEWA KUSAFIRISHWA NJE YA NCHI NA VIKOSI VYA ULINZI NA USALAMA MICHEWENI.

 Gunia 20 za karafuu zilizokamatwa katika kijiji cha Makangale,askari polisi wa kituo cha Micheweni wakiwa katika harakati ya kuzipakia katika gari kuzipeleka katika kituo cha Micheweni.

 Gunia za karafuu zilizokamatwa katika kijiji cha Makangale Wilaya ya Micheweni zikiwa katika kituo cha polisi cha Wilaya ya Micheweni Pemba.

Na Is-haka Mohammed,Pemba.                                                                                             Vikosi vya ulinzi na usalama Wilaya ya Micheweni vimefanikiwa kukamata magunia 20 ya karafuu kavu zikiwa katika harakati ya kutaka kusafirishwa nje ya nchi kwa njia ya magendo.

Akizungumza na Zenji FM Radio Mkuu wa Wilaya ya Micheweni Juma Abdalla Ali amesema karafuu hizo zilikamatwa usiku wa kuamkia tarehe 31 huko Makangale Wilaya ya Micheweni Pemba.

Amesema kuwa taarifa za kukamatwa karafuu hizo zilipatikana baada ya wananchi raia wema kutoa taarifa kwa vikosi vya usalama na ndipo juhudi za kudhibiti zilipochukuliwa kwa haraka.

Amesema karafuu hizo zilipatika katika nyumba moja ambayo ipo karubu na fukwe za bahari maeneo hayo ya makangale.

Abdalla amedai kuwa hadi sasa hakuna  mtu anayeshikiliwa kutokana na tukio hilo ila ameeleza kuwa watu wanaokisiwa kufikia saba walikimbia baada ya kuvamiwa katika nyumba zilizokuwa karafuu hizo ambapo ni mita kama 20 kutoka katika ufukwe wa bahari.

Hata hivyo Mkuu wa Wilaya huyo amesema kuwa hadi sasa  thamani halisi ya karafuu hizo bado hazijajulikana hadi pale zitakapopimwa na kujulikana daraja lake na zipo kilo ngapi.