MARADHI YA NGOZI YATEKETEZA NG`OMBE KISIWANI PEMBA.

Hawa ndiyo baadhi ya ng`ombe wanaokabiliwa na maradhi ya ngozi yanayojulikana kitaalam kwa jina la "Lamp Skin Deasess"(LSD) ambayo yamepelekea ng`ombe zaidi ya 10 kufa Wilaya ya Chake Chake. 

Na Is-haka Mohammed,Pemba.                                                                                                        Maradhi ya ngozi yanayowakabili ng`ombe katika maeneo ya Wilaya ya Chake Chake kisiwani Peemba yamewatia hofu  baadhi ya wafugaji baada ya mifugo yao hiyo kuendelea kuugua na wengine kuanza kupoteza maisha.

Baadhi ya wafugaji hao wameieleza blog hii jinsi ya  maradhi hayo yanavyowaathiri ng`ombe  kwa kupata homa kali inayowasababishia kutoweza kutembea,kula na hatimae baadhi yao kufa.

Khamis Moh`d Khamis anayefanyia shughuli zake za ufukaji katika eneo la Mwanamwaja amesema kuwa magonjwa hayo ya ngozi yamekuja kutokana na mifugo hiyo kutopatiwa chanjo kwa muda mrefu.

“Unajua inakaribia mwaka wa tano saivi ng`ombe hawajapatiwa hizi chanjo kwa hivyo tuna wasiwasi ya kuwa hilo ndiyo sababu kubwa ya kuwepo kwa magonjwa haya”Alisema Khamis.

Alisema kuwa baada ya ng`ombe kupata maradhi hayo hupata homa kali na kuonekana dhaifu huku wakishindwa kutoa maziwa.

Naye Rashid Omar Moh`d wa kijiji cha Mbuni ambaye tayari ng`ombe wake watatu wenye gharama ya zaidi ya shilingi milioni tatu wameshakufa kutakana na maradhi hayo yanayoambukiza.

“Mimi kwa kweli magojwa haya yameniathiri kwani hadi sasa ng`ombe watatu wameshakufa na wengine wawili wanaendelea na maradhi,kwa kweli nimekata tama”Alisema Rashid kwa Masikitiko.

Aidha Rashid alisema kuwa hivi sasa yeye na wafugaji wenzake wamekosa raha hasa baada ya madaktari kutowaweka wazi juu ya tiba sahihi ya maradhi hayo.

“Tunaiomba serikali ituangalie na sisi wafukaji wa hali ya chini maana tunategemea katika ng`ombe wetu lakini ndo hivyo maradhi yanawamaliza ni vizuri wakafanya utafiti wa tatizo hili” Alisisitiza Rashid.

Mfugaji Mzee Ame yeye amesema kuwa ipo haja kwa  Idara ya Mifugo kuanzisha chanjo kila kipindi ili kuweza kuepusha magojwa hayo yanayoweza kuwamaliza ng`ombe wao.

Mzee huyo alisema kutokana na kutokuwepo kwa tiba ya uhakika wamelazimika kutumia dawa mbadala ya kuwaogeshwa kwa maji ya chumvu katika sehemu zilizoathirika na kuwachemshia na kuwanwesha mwarubaini ambapo wamedai wengine zimekuwa zikiwasaidia.

Akizungumzia suala hilo Afisa Mifugo na Tiba Wilaya ya Chake Chake Dk Hemed Suleiman Hemed amethibitisha kuwepo kwa tatizo hilo linalowakumba ng`ombe hapa kisiwani Pemba na kudai yanasababishwa na vimelea vinavyoambukizwa kwa kwa ng`ombe tu.

Alisema magonjwa hayo yapo zamani kisiwani Pemba lakini kipindi kirefu yalipotea baada ya chanjo ambayo ilitolewa kwa ng`ombe hata hivyo katika kipindi cha miezi miwili iliyopita yamerudi tena katika maeneo mbali mbali ya wilaya ya Chake Chake.

Alisema maradhi hayo yanapompata ng`ombe hufanya maboge katika mwili na mgongoni na endapo hatapata chanjo kwa muda uliohitajika ng`ombe anaweza kupoteza maisha.

“Hivi sasa tunaendelea na kutoa chanjo kwa ng`ombe katika maeneo tofauti ya wilaya ya chake na zaidi ya ng`ombe 2000 wameshapatiwa chanjo hiyo ya kuzuia maambukizi”Alifahamisha Dk Hemed.

Aidha kwa upande mwengine amewaelekezea lawama wafugaji kwa kushindwa kuchukua hatua za kuwapatia chanjo ng`ombe wao na kutoa wito kwa kuwapatia chanjo ili kuepusha maambukizi zaidi kwa ng`ombe ambao hawajaathirika.

 Clip………………………Dk Hemed

Ng`ombe wapatao 10 wa maziwa wamesharipotiwa kufa kutokana na maradhi hayo hapa wilaya ya chake chake, na baadhi ya wafugaji wamedai kuchelewa kwa chanjo ndiko kulikopelekea kusambaa kwa maradhi hayo.