PEMBAHABARI

Na Is-ha Mohammed,Pemba.                                                               Naibu Mwenyekiti wa Mahakama ya Ardhi Pemba Salum Hassan Bakari amesema ni wajibu wa kila mmoja kuhakikisha amani ya nchi iliyopo inatuzwa ili kuendelea kuwepo na amani na utulivu nchini.

Mh. Hassan ameyasema hayo leo huko Madungu Chake Chake wakati akifungua Kongamano juu ya  maadhimisho ya siku ya Amani duniani lililoandaliwa na Jumuiya ya Vijana ya Umoja wa Mataifa(YUNA Pemba) kwa kushirikiana na Jumuiya ya Waandishi wa Habari wa kujitegemea Pemba (PFO).

Amesema jukumu la kulinda Amani ya Nchi ni Serikali,lakini jukumu zaidi linaangukia kwa wanajamii wenyewe kwa vile watu wanaoshiriki katika matendo ya uvunjifu wa amani wanatoka  ndani jamii iliyowazunguka.

Amesema matendo yanayoendelea kuibuka Zanzibar na Tanzania kwa jumla ya kumwagiwa watu tindikali, licha ya kuwa ya kikatili bali yanaweza kuipeleka nchi katika uvunjiwa wa amani na utulivu uliomudu kwa muda mrefu.

Amesema ni busara kwa Watanzania  kuondoa tafauti zao za kisiasa,kidini,kikabina na kikanda na kuungana kuwafichuwa watu wanaendelea kuhatarisha amani na utulivu uliopo nchini.

Akichagia katika Kongamano hilo Mwenyekiti wa Jumuiya ya Madereva Mkoa wa Kusini Pemba Mw. Moh`d Ali Shela  amesema ili elimu isaidia katika kuleta maendeleo ya amani nchini serikali inatakiwa kuchukuwa juhudi za makusudi kupambana na suala la ukosefu wa ajira nchini, sambamba na kupunguza mfumuko wa bei za bidhaa hasa za chakula.

Amesema kuwa kuwepo kwa ukosefu wa ajira kwa jamii kunapelekea vijana kujiingira katika vitendo vya utumiaji wa madawa ya kulevya,wizi na vitendo vyengine viovu hatimae kusababisha kutoweka kwa amani nchini.

Aidha ameisa jamii kutojiingiza katika vitendo vya uvunjifu wa amani kwa vile amani ikivunjika hakuna chochote kitakachoweza kufanikiwa,kwa vile shughuli zote za kimaendeleo  kama vile kilimo,biashara na nyenginezo hazitoweza kufanyika na kusababisha njaa na ukame katika nchi huku akitolewa mfano katika nchi za Syria na Somalia.

Naye Mrati wa YUNA Pemba Mw. Mohammed Hassan ameitaka serikali kuweka mikakati madhubuti ya kukabiliana na uvunjifu wa amani nchini,huku akitowa wito kwa walimu mashuleni kutoa elimu ya umuhimu wa amani kwa wanafunzi.