Maji ya mionzi ya sumu ya kinuklia yavuja

Kampuni  inayomiliki  kinu  cha  kuzalisha  umeme kwa kutumia nishati ya  kinyuklia  cha  Fukushima  Dai-ichi nchini  Japan  imesema kiasi  ya  lita 430 za  maji yamevuja  wakati  wafanyakazi  walipojaza  kupita  kiasi tangi  ambalo  halikuwa  na  kipimo  maalum  cha  kuweza kuwapa  tahadhari  juu  ya  hatari  iliyopo. 

Kiwango  hicho cha  maji  ni  kidogo  ikilinganishwa  na  maelfu  kadhaa  ya tani  za  maji  yenye  mionzi  ya  sumu  ambayo  yamevuja, mengi  yake  yameingia  katika  bahari  ya  Pacifik, tangu lilipotokea tetemeko  kubwa  la  ardhi  na  Tsunami  na kukiharibu  kinu  hicho  mwaka  2011. 

Kampuni inayoendesha  kinu  hicho ya  Tokyo Electric Power, imesema jana  kuwa  wafanyakazi  hao  waligundua  kuwa maji  hayo  yanavuja  kutoka  juu  ya  tangi  hilo  kubwa wakati  wakifanya  doria  katika  eneo  hilo usiku juzi. 

Tangi hilo ni  moja  kati  ya  matangi 1,000 yaliyowekwa  katika maeneo  ya  kiwanda  hicho  kuhifadhi  maji  yanayotumika kupooza  nishati ya nyuklia inayoyeyuka katika  kinu kilichoharibiwa.