Miili kadha yapatikana Westgate

Miili  kadhaa  imegunduliwa  kutoka  katika  jengo lililoharibiwa  nchini  Kenya  la  Westgate  kufuatia shambulio  baya  lililofanywa  na  watu  wenye  silaha . Polisi  nchini  Kenya  imesema  kuwa  uchunguzi  zaidi unaendelea  kuweza  kupata  sababu  na  wahanga  zaidi.

Zaidi  ya  miili tisa  imepatikana   kutoka  vifusi  vya  jengo hilo, miili  mingine  ikiwa  imeharibika  kutokana  na  moto mkali  ambao  uliteketeza  sehemu  ya  jengo  hilo.

Baadhi  ya  duru  za  polisi  zimesema  kuwa  baadhi  ya miili  haiwezi kutambulika  na  inahitaji  uchunguzi  wa vinasaba DNA  kuweza  kuitambua.

Hata  hivyo  haijafahamika  iwapo  miili  hiyo  iliyopatikana imejumuishwa  katika  idadi  ya  watu  67  waliofariki  katika shambulio  hilo, ama ni  miongoni  mwa watu 39 wanaohofiwa  kuwa  hawajulikani  waliko.

Wakati  huo  huo  kundi  la  al-Shabaab  la  Somalia limetishia  leo  kuwa  litaongeza  mashambulio  yao  dhidi ya  Kenya ,  baada  ya  serikali  kusema  haitaondoa majeshi  yake  nchini  Somalia.