BARAZA LA MJI WA CHAKE CHAKE LAPATA MSAADA WA MAGARI MAWILI YA KUZOLEA TAKA.

WILAYA YA CHAKE CHAKE.                                                              BARAZA LA MJI wa Chake Chake  limepokea msaada wa vikapu vya kuzolea taka pamoja na magari mawili ambayo ni msaada kutoka bank ya dunia kupitia serikali ya mapinduzi ya Zanzibar.

Hayo yameelezwa na katibu wa Baraza hilo Nassor Suleiman Zaharani  wakati akizungumza na Sauti ya Istiqama huko ofisini kwake Chachani Chake Chake.

Amesema msaada huo utasaidia sana katika kuweka usafi  katika maeneo mbali mbali ya mji huo  kwa vile kabla walikuwa wakipata upungufu mkubwa kwa kukosa vitendea kazi jambo ambalo lilikuwa likikwamisha kazi zao za kila siku.

Amesema  msaada huo ni muhimu kwa wakati huu kwani utasaidia kuimarisha usafi katika maeneo tofauti ya mji kwa vile baraza  limeshaanza kuvisambaza vikapu hivyo katika maeneo ambayo yana tatizo ya sehemu za kuhifadhia taka.

Hata hivyo katibu huyo amewataka wananchi kuvitumia vikapu hivyo kwa kuhifadhia taka kwa kuzitia ndani yake na wasizitupe chini ya vikapu hivyo kwani husababisha kusambaratika ovyo jambo ambalo hupelekea kuongezeka kwa uharibifu wa mazingira.

Katibu huyo wa Baraza la mji amesema changamoto kubwa inayowakabili ni vikapu hivyo kubakisha taka wakati wa umwagaji,huku akiomba msaada zaidi wa magari ili kuweza kumudu vizuri katika kuweka mandhari ya mji huo vizuri.