WANAUSHIRIKA WA "NURU NJEMA" MKOANI PEMBA WALIA NA UKATA.

WANAUSHIRIKA wa ‘Nuru njema’ ambao ni mayatima unaojishughulisha na ufugaji kuku wa mayai, uliopo Mbuguani Wilaya ya Mkoani Pemba, upo hatarini kutoweka, baada ya kudaiwa kiasi cha shilingi 2,000,000 (milioni mbili) na wafanyabiashara wa vyakula vya mifugo.

Akizungumza na Sauti ya Istiqama Mshika fedha wa ushirika huo Pili Nassor Kali amesema kuwa deni hilo limesababishwa kutokana na kupanda kwa gharama za vyakula vya mifugo.

Mshika  fedha huyo, amesema hapo awali gunia moja la chakula cha mifugo hiyo, waliweza  kulinunua  kwa bei ya shilingi elfu 25 ambapo kwa sasa limepanda na kufikia shilingi elfu 47.

 Aidha amesema, hukosekana kwa chakula hicho kwa baadhi ya wakati  kisiwani Pemba, hulazimika kuwapatia chakula chengine ambacho hakina lishe bora kwa mifugo hiyo.

Amesema kutokana na ukosefu wa fedha na kupanda bei kwa chakula hicho, walilazimika kukopa katika maduka mbali mbali ambapo kwa sasa deni limeanza kuwazidi.

Kwa upande wake Mjumbe wa ushirika huo Omar Abdallah Omar amesema hakuna faida yoyote wanayoipat a kwa vile wameshindwa kugawana fedha walizozipata kutokana na mradi huo kwa kuhofia hasara kubwa zaidi.

Hivyo wameiomba serikali na taasisi binafsi kujitokeza  ili kuweza kuwasaidia kuweza kujikwamua  na deni hilo, ili ushiriika wao uweze kusonga mbele.

Ushirika huo wa ufugaji wa kuku wa mayai, wenye lengo la kuwaendeleza mayatima waliopo Mbuguani, umeanzishwa mwaka 2009,  kwa ufadhili wa Mfuko wa Maendeleo ya Jamii (TASAF) ukiwa na wanachama 11

MWISHO